|
|
...Ekki reyna að mótmæla eftirfarandi:
laugardagur, desember 03, 2005
Ég tók eitthvað helvítis próf sem sagði að ég væri lélegur í rúminu eða "terrible" eins og það orðaði það.
Þetta ljóta próf má finna hér.
En á öðrum nótum, þá erum við að læra stærðfræði í stærðfræðikontórnum Tjarnargötu 28. Alveg er það ótrúlegt bullið sem vellur upp úr manni. Gummi F er gjörsamlega búinn að missa vitið, Jósep og Jónína eru alltaf við það að fara að ríða og sjálfur þarf ég að sitja undir þessu! Djöfullinn, allir eru að verða geðveikir nema ég.
föstudagur, desember 02, 2005
Ég hata jólin.
Í byrjun hvers desembermánaðar byrjar það. Ham -og vitstola æða tugir þúsunda kófsveittra foreldra með öskrandi og grenjandi, illa lyktandi krakkagemlinga í eftirdragi út í Kringlu, berja frá sér með stútfullum innkaupapokum og setja helvítis þjófavarnakerfið af stað í hverri einustu búð sem þeir sjá.
Í byrjun hvers eins og einasta guðslifandi desembermánaðar byrja Malt og Appelsín auglýsingarnar með helvítis syngjandi krakkaógeðinu. Viðbjóður.
Í byrjun þessa guðsvolaða mánaðar byrja þessi ógeðslegu jólalög út um allt. Risastórir, reykspjúandi, upplýstir kólatrukkar koma skröltandi niður Laugaveginn, básúnandi þessum jólahrylling yfir aumingja mannskepnuna sem í öngum sínum reynir að kaupa kerti og spil.
Með hverjum desembermánuð sem líður bætist nýr viðbjóður við. Núna er þessu hræðilega "Hjálpum þeim" lagi útvarpað út í hvert horn og kima í nýrri útgáfu, verra en nokkrusinni fyrr!
Hver einn og einasti söngvari þjóðarinnar finnur sig knúinn til þess að drita einu, ef ekki tveimur jólalögum á báða bóga og á endanum eru, ár hvert, komnar 15 nýjar útgáfur af þessum 3 jólalögum sem þessi þjóð þykist eiga. Þetta hljómar allt eins fyrir mér, eins og köttur sem verið er að kyrkja.
Svo er það "jólabókaflóðið". Flestar bækurnar þarna eru svo ótrúlega ómerkilegar og óáhugaverðar. T.d. þessi hérna, Yosoy - Af líkamslistum og hugarvíli í hryllingsleikhúsinu við Álafoss.
Ég verð bara þreyttur af því að lesa nafnið á þessu fargani.
Ég hata jólin.
fimmtudagur, desember 01, 2005
10 raunhæfir hlutir til að gera í samræmdu stúdentsprófi:
1. Mætið 45 min of seint. Þá þurfið þið bara að sitja í u.þ.b. 20 min í staðinn fyrir klukkutíma þar sem það má koma klukkutíma of seint. (Ég prófaði þetta í dag. Þetta virkar.)
2. Búið til skutlu úr miðanum sem er notaður til að merkja borðin ykkar.
3. Rífið umslagið utan um prófið "óvart" þegar þið eruð að taka það upp.
4. Meðan þið eruð að rífa umslagið, reynið þá að rífa límið sem er notað til að loka umslaginu af því. Límið það svo beint framan á prófið. (Ég gerði þetta í dag. Kennarinn reif prófið mitt við að reyna að ná límbandinu af. Það var mergjað.)
5. Reynið allar afsakanir til að komast fyrr út úr prófinu. "En ég er að fara að giftast eftir 15 min!"
6. Beyglið prófið og krumpið eins mikið og þið getið svo að vélin sem fer yfir prófin taki ekki við því.
7. Teiknið á prófið með risastórum svörtum Artline tússpenna.
8. Skrifið sérstaklega mikið á svæðin þar sem stendur: "Hér má ekki skrifa"
9. Spyrjið kennarann hvort að hann nenni ekki að vekja ykkur þegar þið megið fara út.
10. Setjið hor inn í prófið og límið svo blaðsíðurnar saman. Setjið svo hor innan í umslagið áður en prófið fer þar ofan í, þá festist það.
Jæja. Skemmtið ykkur.
þriðjudagur, nóvember 29, 2005
Ég trúi ekki nokkurn guð. Ég er trúlaus. Ég er skráður í þjóðkirkjuna.
Þetta er mótsögn, ég veit það. Afhverju er ég enn skráður í þjóðkirkjuna?
Ég er einfaldlega letingi.
Margir íslendingar geta væntanlega sagt það sama og ég varðandi þjóðkirkjuna. Þeir eru trúlausir en samt sjálfkrafa skráðir í þennan söfnuð frá fæðingu. Ég sá þessa mjög áhugaverðu og vel skrifuðu grein. 85,5% þjóðarinnar eru skráð í þjóðkirkjuna (tölur Hagstofunnar frá 1. desember 2003). Ég fæ mig ekki til þess að trúa að meira en 50% þjóðarinnar séu það heittrúaðir að þeir þoli ekki aðskilnað.
Núna nýlega komst ég hinsvegar að því að þau gjöld, sem annars renna til þjóðkirkjunnar, renna til Háskóla Íslands ef maður fer niður á Hagstofu og lýsir sig trúlausan.
Þar sem ég fer ekki nokkruntíman í kirkju og tel HÍ hafa margt þarfara við peninginn að gera ætla ég að segja mig úr þjóðkirkjunni eins fljótt og auðið er.
Better yet...
Þvingum fram aðskilnað með því að fá fjölda þeirra sem skráðir eru í þjóðkirkjuna niður fyrir 60% og setjum þessar 3.000.000.000 (já, þrír milljarðar) krónur í menntakerfið (Háskóla Íslands) í staðinn!
Ef söfnuðir kirknanna nenna ekki, vilja ekki eða geta ekki haldið henni uppi með fjárframlögum, þá á hún að mínu mati ekki rétt á sér.
Fíledelfíusöfnuðurinn lifir góðu lífi með fjárframlögum safnaðarins! Krossinn! Vegurinn og allt þetta helvítis bull grasserar í íslensku þjóðlífi eins og mosi á íslensku hrauni. Það er nákvæmlega ekkert því til fyrirstöðu, nema fokking leti, að hin evangelíska lúterska kirkja geri það líka.
Ef hin evangeliska lúterska kirkja lifir aðskilnaðinn af, tel ég að hún muni færast á nýtt og æðra stig. Nú þarf kirkjan að leggja sig fram við að halda söfnuðinum vegna þess að hún reiðir sig á fjárframlög hans. Messur munu vera fluttar fyrir fullu húsi í stað einna eða tveggja hræða sem eru bara að leita að húsaskjóli. Messur munu þurfa að færa sig yfir í nútímalegra horf til þess að færa heimspeki trúarinnar nær raunveruleika þess sem hlustar. Ég lofa að mæta í eina slíka messu ef þetta verður að raunveruleika.
Ef, á hinn bóginn, hin evangeliska lúterska kirkja lifir aðskilnaðinn ekki af þá á hún ekki rétt á sér. Trú sem hefur engan söfnuð er engin trú, bara gömul bábilja. Ef enginn finnur sig knúinn til þess að halda kirkjunni uppi með fjárframlögum, hvernig getur hún þá átt rétt á sér?
Og eitt enn. Hvernig væru nú að rífa einhverjar af þessum for-fokkings-ljótu 9. áratugar-nýbylgju-arkitektúrskirkjum og byggja eitthvað nytsamlegt í staðinn?
Ég meina það! Ojbarasta. Og treystið mér, þetta er alls ekki sú ljótasta. Þessi er Péturskirkjan í Róm samanborið við sumar kirkjur á höfuðborgarsvæðinu.
|
|
|
