|
|
...Ekki reyna að mótmæla eftirfarandi:
laugardagur, nóvember 11, 2006
Þá er komið að hinni árlegu jólafærslu… þær verða sennilega fleiri þessi jól þannig að þið getið sannfærst betur um hve mikið jólin sökka.
Þessi hátíð fer að ganga í garð. Þessi ömurlega hátíð hræsnara, verslunareigenda og aðdáenda sykurhúðaðra, endurunninna jólapoppballaða með lélegri íslensku. Hvenær byrjaði mannkyninu að hraka svo mikið að það fer virkilega að búa til aðstæður, vandamál, sem hvergi er grundvöllur fyrir nokkursstaðar? Við erum, fyrir tilstilli einhverrar ótrúlegrar samverkunar illra tilviljana, búin að negla okkur upp á þann kross að þurfa að kaupa gjafir og mat handa vanþakklátu fólki sem okkur er drullusama um fyrir hundruðir þúsunda króna! Alltaf það sama helvítis helvíti á hverju ári! Hvernig gerðist þetta!?
Þetta er svo gífurlega sorglegt vegna þess að jólin eru auglýst sem “hátíð kærleikans” og hvernig sýnir foreldri ást sína á afkvæmi betur en með SEXTÍU ÞÚSUND MILLJÓN GÍGAWATTA ÆPOTT MEÐ… INNBYGGÐU GRÓÐURHÚSI SEM ÞÚ HEFUR ENGIN NOT FYRIR!? Er fólk virkilega svona lokað? Nei, það held ég ekki. Það vill bara ekki segja eitthvað “Mér þykir vænt um þig” vegna þess að það væri svo mikil lygi að nefið á Gosa yrði jafnlangt og Baugsmálið.
Svo er einhverjum leiðinlegum fjarskyldum apaköttum sem maður veit ekki hvað heitir þröngvað upp á mann í hverju boðinu á fætur öðru þar til maður er svo gjörsamlega örmagna á krakkaskrækjum og eldriborgararöfli að maður gæti hengt sig í næstu jólaseríu. Jújú, vissulega þykir mér vænt um mörg skyldmenni mín og þau vita það sem þetta lesa, en þau hin sem ég veit hreinlega ekki hvað heita væri ég alveg til í að bara hitta ekkert um þessi jól… eða nokkur önnur.
Svo eru það auglýsingarnar. Oh, þessar auglýsingar. Ég vil ekki telja upp allar þær sem ég þoli ekki heldur er nokkuð víst að ef minnst er á jól í auglýsingunni og þau notuð sem söluvara, þá slekk ég á sjónvarpinu áður en ég hendi því út um gluggann. Þess í stað ætla eg að vara við einni auglýsingu sem sameinar allt það versta við jólaauglýsingar… helvítis auglýsingin frá Egils með litlu ljóshærðu stelpunni. Hvaða sandrótsjóðandibölvað helvítis helvíti er það eiginlega!? Þessi djöfulsins krakkaskratti gólandi eitthvað skrattans kukl, umkringd öllu því klisjukenndasta við jólin! Með þessu er spilað inn á samvisku eldri kvenna og annars veiklundaðs folks og þeim skilaboðum einhvernveginn lætt inn í undirmeðvitundina að þú sért á einhvern hátt að hjálpa litlu telpunni með því að kaupa frá Egils. Fokking ömurlega kjaftæði. Svo græða allir búðareigendur milljónir ofan á milljónir og treystið mér, þeir þakka ekki Guði fyrir þann pening.
Fokk!
|
|
|
