|
|
...Ekki reyna að mótmæla eftirfarandi:
laugardagur, mars 11, 2006
Klukkan 3 í nótt vaknaði ég við að síminn minn hringdi. Það var Valdi nokkur. Hann tilkynnti mér að núna myndi ég rífa mig upp og koma í partý með systur minni og nokkrum öðrum lögfræðinemum eða hann kæmi að sækja mig.
Ég sagði, ekki trúandi að hann yrði af því, að hann þyrfti þá að koma að sækja mig og fór svo að sofa aftur. 5 min seinna hringdi Vigga sys og sagði mér að Valdi væri á leiðinni út að sækja mig. Þar sem ég vildi ekki leggja hann í það reif ég mig upp og fór í partý.
Sjitt segi ég nú bara. Svo vaknaði ég í dag og hélt að mig hefði verið að dreyma.
Ég, Gummi F, Jósep og Árni horfðum á "The exorcism of Emily Rose" eða eins og ég þýði það: "Andasæring Emils í rós" í kvöld. Jósep talar rosalega mikið þegar hann verður hræddur. Mikið skelfilega var það fyndið. Árni hlær þegar hann verður hræddur og Gummi F þegir bara stjarfur.
Þar sem ég var búinn að sjá myndina áður þá fylgdist ég frekar með viðbrögðum hinna en fyrst þegar ég sá hana held ég að ég hafi stirðnað upp.
En ég, skartandi þessu æðislega glóðarauga, gekk niður í eldhús fyrr í dag og tjáði pabba að ég ætlaði að fara að skila einhverri mynd sem ég leigði fyrir stuttu.
Samtalið fór á þessa leið:
Ég: "Pabbi, ég ætla að fara að skila þessari mynd"
Pabbi: "Ókei, en hvernig er glóðaraugað"
Ég: "Það er allt að verða betra. Ég verð orðinn jafnsætur og alltaf á morgun"
Pabbi (með fúlustu alvöru í svipnum og stökk ekki bros): "Þú mættir nú samt alveg vera fríðari"
Djöfull var þetta mikill löðrungur.
föstudagur, mars 10, 2006
Fiðluballið var geðveikt! Takk fyrir dansana Renata, Ingunn, Helga, Steffí, Jóhanna, Íris, Magga, Sandra, Gyða og margar fleiri =). Einnig vil ég þakka Gyðu fyrir heimfylgdina og svo strákunum (you know who you are) á Ara í Ögri fyrir djammið.
Annars átti ég eftirfarandi (ómerkilegt) samtal við pabba þegar ég var að sækja frakkann minn í miðri heimfylgdinni.
Ég kom inn, náði í frakkann og var að klæða mig í hann í forstofunni.
Pabbi: "Halló, varst þú ekki með frakkann?"
Ég: "Ha? Ég er að klæða mig í hann"
Pabbi: "Bíddu, varstu ekki í honum?"
Ég: "Nei, ég kom heim til að sækja hann, afhverju skiptir þetta einhverju máli?"
Pabbi: "Æ, þú varst... þarna... þú ert í frakkanum þínum"
Ég: "Já pabbi, ég er í frakkanum mínum"
Pabbi: "Já... gott"
Ég: "Frábært"
Pabbi: "bæ"
Ég: "bæ"
,- ómerkilegasta samtal í heimi.
fimmtudagur, mars 09, 2006
Lyktarskynið mitt er gersamlega að ganga af göflunum. Síðustu tvær vikur er ég búinn að finna mismunandi lykt hvern dag þó að enginn annar geti staðfest þessar lyktir.
Hvað gengur eiginlega á? Í dag er ég búinn að finna svona grilllykt allsstaðar og í gær fann ég svona lykt af nýrri bók allsstaðar.
Er ég kannski að missa vitið?
þriðjudagur, mars 07, 2006
Bernhard nokkur Shaw sagði: "Sá, sem ekki verður sósíalisti af að kynna sér stjórnmál, - hann er fífl."
Ég segi: "Bernhard Shaw, - hann er fífl"
mánudagur, mars 06, 2006
Ég ákvað að taka til í eldhúsinu í kvöld vegna þess að mamma bað mig um það. Þarna sat ég og var að klára að fá mér að borða áður en ég myndi byrja að taka til. Þá gekk pabbi inn í eldhúsið á náttfötunum, tók fram glas og hellti mjólk í það. Hann leit stutt í kringum sig og ég sá þennan "tiltektarglampa" í augunum á honum. Ég ákvað að framkvæma fyrirbyggjandi aðgerð með því að segja við hann:
"Pabbi, ég skal taka til í eldhúsinu, ekki hafa áhyggjur af því. Þú getur bara farið upp að sofa"
Pabbi: "Já... öhh... uhm... ókei"
- og svo fór hann að taka til.
Ég: "Pabbi, þú þarft í alvörunni ekki að vera að þessu. Ég skal gera þetta."
Pabbi: "Já... ókei. Ég bara þarna... ætla að fá mér brauð."
- svo setur hann brauð í ristavélina og bíður í smástund. Virðist taugaóstyrkur. Svo poppar brauðið upp úr ristavélinni og á meðan hann er að smyrja það segi ég:
"Pabbi, ég tek til hérna. Þú þarft ekki að hafa áhyggjur af því"
"Jájá... Ég ætla að bara að ganga frá þessu hérna... "
- Fer að ganga frá smjörinu inn í ísskáp
Ég: "Pabbi, í alvörunni, farðu bara upp. Ég skal sjá um þetta"
Pabbi: "ööhhmm.. já... ókei"
- Pabbi hættir að taka til og staflar brauðinu upp á mjólkurglasið og segir svo rétt áður en hann fer út:
"Öhmm... Gummi Palli"
Ég: "Jamm?"
Pabbi: "Gætirðu nokkuð gert mér ofurlítinn greiða?"
Ég: "Ekkert mál. Hvað?"
Pabbi: "Gætirðu nokkuð lagað til hérna í eldhúsinu áður en þú ferð að sofa?"
Ég: "... já pabbi."
Alveg ætti ég að gefa honum allar mínar eigur og veita honum verðlaun. Hann er æðislegur.
|
|
|
